Uambishaji wa Vitenzi vya Kiingereza katika Kiswahili: Mifano kutoka Mitandao ya Kijamii ya Kielektroniki

Abstract

Baada ya teknolojia ya habari na mawasiliano kukua, kumezuka aina nyingine
ya mawasiliano ambayo inawahusisha watu wenye mwelekeo mmoja kirika,
kijamii na hata kitaifa kujadili masuala yao kwa urahisi na kwa gharama
ndogo kwa kutumia mitandao ya kijamii ya kielektroniki (MKK). Mitandao hii
inaondoa vikwazo vya kijiografia na kimiundombinu, ambapo watu kutoka
pande mbalimbali za dunia wanaweza kujadiliana kwa wakati mmoja au kila
mmoja kwa wakati wake kwa njia ya maandishi. Makala hii inachunguza
namna wazungumzaji wa lugha ya Kiswahili wanavyoambisha baadhi ya
vitenzi vya Kiingereza kwa kutumia kanuni za sarufi ya Kiswahili katika
MKK. Data zilikusanywa kutoka katika vipindi vya redio, televisheni, facebook
na twitter. Kiwango cha maneno tunachokiona ni kidogo ikilinganishwa na
yale yanayozungumzwa kwa sababu si kila anayezungumza ni lazima aandike
maneno hayohayo. MKK ni uwanja mpya unaopaswa kufanyiwa utafiti kuhusu
masuala mbalimbali, hususan lugha na fasihi.
Dhana za msingi: unyambulishaji vitenzi, teknolojia na mawasiliano, vitenzi
vya Kiingereza, Kiswahili.